പിൻഗാമി വന്നതിൽ സന്തോഷം: മാനുവൽ ഫെഡ്രിക്‌സ്‌
Friday Aug 6, 2021
p r sreejesh photo credit olympics.com
കണ്ണൂർ
ഒളിമ്പിക്‌ വെങ്കല മെഡലുമായി മലയാളി ഗോൾകീപ്പർ എം ആർ ശ്രീജേഷ്‌ വരുന്നതിൽ അഭിമാനവും സന്തോഷവും പങ്കുവച്ച്‌ മാനുവൽ ഫെഡ്രിക്‌സ്‌. 1972ലെ മ്യൂണിക്ക്‌ ഒളിമ്പിക്‌സിൽ വെങ്കലം നേടിയ ഇന്ത്യൻ ഹോക്കി ടീമിന്റെ ഗോളിയായിരുന്നു കണ്ണൂർക്കാരൻ. ഒളിമ്പിക്‌സിൽ മെഡൽ നേടുന്ന ആദ്യ മലയാളിയാണ്‌.
‘ടോക്യോയിലെ മുഴുവൻ കളിയും കണ്ടിരുന്നു. ശ്രീജേഷിന്റെ പ്രകടനം ഒന്നിനൊന്ന്‌ മികച്ചതായിരുന്നു. ലൂസേഴ്‌സ്‌ ഫൈനലിൽ ജർമനിയുടെ ഗോളെന്ന്‌ ഉറച്ച മൂന്ന്‌ രക്ഷപ്പെടുത്തലുകൾ എടുത്തുപറയേണ്ടതാണ്‌. ജർമനിക്കെതിരെ ശ്രീജേഷും അമിത്‌ ദാസുമാണ്‌ തിളങ്ങിയത്‌. ഈ ഇന്ത്യൻ ടീം സ്വർണം നേടുമെന്നായിരുന്നു പ്രതീക്ഷ. എങ്കിലും ഈ വെങ്കലം പൊരുതി നേടിയതാണ്‌. അതിനാൽ പൊന്നിന്റെ തിളക്കമുണ്ട്‌’–- മാനുവൽ പറഞ്ഞു.