‘പാരിസ്‌ സ്വപ്‌നത്തിലുണ്ട്‌’
Friday Aug 6, 2021
photo credit hockey india twitter
ടോക്യോ
പാരിസിൽ നടക്കുന്ന അടുത്ത ഒളിമ്പിക്സ് സ്വപ്‌നത്തിലുണ്ടെന്ന്‌ ഇന്ത്യയുടെ മലയാളി ഗോൾകീപ്പർ പി ആർ ശ്രീജേഷ്‌ പറഞ്ഞു. എന്നാൽ ആദ്യ ലക്ഷ്യം ഏഷ്യൻ ഗെയിംസാണ്‌. തുടർന്ന്‌ കോമൺവെൽത്ത്‌ ഗെയിംസും ലോകകപ്പും മുന്നിലുണ്ട്‌. അതിനാൽ പാരിസിനെക്കുറിച്ച്‌ ആലോചിക്കാൻ ഇനിയും സമയമുണ്ട്‌.
മെഡൽ നേട്ടം
വെങ്കല മെഡൽ നേട്ടം ഇന്ത്യൻ ഹോക്കിയുടെ പുനർജന്മത്തിന്‌ വഴിയൊരുക്കും. ജർമനിക്കെതിരെ ജാഗ്രതയോടെയാണ്‌ കളിച്ചത്‌. അവസാന നിമിഷംവരെ പോരാടുന്ന ടീമാണ്‌ ജർമനി.
അച്ഛന്‌ സമർപ്പണം
ഒരു കായികതാരത്തിന്റെ വളർച്ചയ്‌ക്ക്‌ കുടുംബത്തിന്റെ പിന്തുണ പ്രധാനമാണ്‌. തുടക്കത്തിൽ അച്ഛന്റെ നല്ല പിന്തുണയുണ്ടായിരുന്നു. വിവാഹശേഷം ഭാര്യയുടേയും. അവരുടെയെല്ലാം പിന്തുണയുള്ളതുകൊണ്ടാണ്‌ ഹോക്കിയിൽ ശ്രദ്ധിക്കാനായത്‌.
വനിതാ ടീം ഗംഭീരം
വനിതാ ഹോക്കി ടീമിന്റെ പ്രകടനം അത്ഭുതകരമാണ്‌. മൂന്ന്‌ കളി തോറ്റശേഷമാണ്‌ മടങ്ങിവരവ്‌. അവരുടെ വിജയങ്ങൾ ഞങ്ങൾക്ക്‌ ആത്മവിശ്വാസവും ആവേശവും പകർന്നു.