കളത്തിൽ ഇന്ത്യൻ കുപ്പായക്കാർ

Wednesday Nov 6, 2024
ജിജോ ജോർജ്‌

കൊച്ചി
സംസ്ഥാന സ്‌കൂൾ കായികമേളയിലെ ഫുട്‌ബോൾ കളത്തിൽ മൂന്ന്‌ ഇന്ത്യൻ താരങ്ങളും. പനമ്പിള്ളി നഗർ ജിഎച്ച്‌എസ്‌എസ്‌ മൈതാനത്ത്‌ നടക്കുന്ന സീനിയർ പെൺകുട്ടികളുടെ കളിയിൽ കണ്ണൂർ ടീമിനായാണ്‌ ജൂനിയർ ഇന്ത്യൻ താരങ്ങളായ ഷിൽജി ഷാജിയും അഖില രാജനും ബി എൽ അഖിലയും ബൂട്ടുകെട്ടിയത്‌. കണ്ണൂർ സ്‌പോർട്‌സ്‌ ഡിവിഷന്റെ താരങ്ങളാണ്‌ മൂവരും.

മുന്നേറ്റ താരമായ ഷിൽജി ഷാജി ബംഗ്ലാദേശിൽ നടന്ന അണ്ടർ 17 സാഫ്‌ കപ്പിൽ ടോപ് സ്‌കോററായിരുന്നു. തായ്‌വാനിൽ നടന്ന എഎഫ്‌സി കപ്പിലും ഇന്ത്യൻ ജേഴ്‌സി അണിഞ്ഞു. അഖിലേന്ത്യാ ഫുട്‌ബോൾ ഫെഡറേഷന്റെ ഭാവിതാരമായി തെരഞ്ഞെടുക്കപ്പെട്ടു. മധ്യനിര താരമായ അഖില രാജൻ അണ്ടർ 19 സാഫ്‌ കപ്പ്‌ ജേതാക്കളായ ഇന്ത്യൻ ടീമിൽ അംഗമായിരുന്നു. അണ്ടർ 17 എഎഫ്‌സി കപ്പിലും കളിച്ചു. മുന്നേറ്റ താരമായ ബി എൽ അഖില ഇന്ത്യ–-ജോർദാൻ സൗഹൃദമത്സരത്തിലാണ്‌ ഇന്ത്യക്ക്‌ കളിച്ചത്‌. ഷിൽജിയും അഖില രാജനും ഈ മത്സരവും കളിച്ചു.

ഇതിനകം ഗോകുലം എഫ്‌സി ടീമിൽ അംഗങ്ങളാണ്‌ ഷിൽജിയും അഖില രാജനും. ഇരുവരും കേരള സ്‌കൂൾ കായികമേളയുടെ ഉദ്‌ഘാടനച്ചടങ്ങിൽ ദീപശിഖയുമേന്തി. ഷിൽജിയാണ്‌ പ്രതിജ്ഞ ചൊല്ലിയത്‌.