കോഴിക്കോട്‌ ബീച്ചിൽ ദിശ -എക്സ്പോ 
അറിയാം 
ഉന്നത വിദ്യാഭ്യാസം

Wednesday Jan 4, 2023

കോഴിക്കോട്
പൊതുവിദ്യാഭ്യാസ വകുപ്പ് ഹയർസെക്കൻഡറി വിഭാഗം കരിയർ ഗൈഡൻസ് ആൻഡ്‌ അഡോളസെന്റ് കൗൺസലിങ് സെല്ലിന്റെ "ദിശ' ഹയർ സ്റ്റഡീസ് എക്സ്പോയ്ക്കും കരിയർ സെമിനാറുകൾക്കും തുടക്കം. കോഴിക്കോട് ബീച്ചിൽ  എക്സ്പോയുടെ ഉദ്ഘാടനം മന്ത്രി വി ശിവൻകുട്ടി നിർവഹിച്ചു.  
ഹയർസെക്കൻഡറിക്കു ശേഷമുള്ള ഉപരിപഠന സാധ്യത പരിചയപ്പെടുത്തുന്നതാണ് മേള. 50ലേറെ സർവകലാശാലകളുടെയും ഉന്നതവിദ്യാഭ്യാസ സ്ഥാപനങ്ങളുടെയും സേവനം ലഭ്യമാണ്. പൊതുമേഖലയിലുള്ള അമ്പതിലേറെ ഉന്നത വിദ്യാഭ്യാസ സ്ഥാപനങ്ങൾ ഒന്നിക്കുന്നുമുണ്ട്‌. സിവിൽ സർവീസ്, വിദേശ വിദ്യാഭ്യാസം, എൻജിനിയറിങ്, മെഡിക്കൽ, ടൂറിസം, സ്പോർട്സ്, കൊമേഴ്സ്, സാഹിത്യം, ഫോട്ടോഗ്രാഫി, സിനിമ, മാധ്യമപ്രവർത്തനം, സംരംഭകത്വം, രക്ഷാകർതൃത്വം തുടങ്ങിയ വൈവിധ്യമാർന്ന വിഷയങ്ങളിൽ സെമിനാറുകളും പാനൽ ചർച്ചകളുമുണ്ടാകും. ശനിവരെ നീളുന്ന മേളയിൽ വിദ്യാർഥികൾക്കും രക്ഷിതാക്കൾക്കും പൊതുജനങ്ങൾക്കും പങ്കെടുക്കാം. സെമിനാറുകളിൽ പങ്കെടുക്കാൻ www.disha2023.in എന്ന വെബ്സൈറ്റിൽ രജിസ്റ്റർ ചെയ്യണം.

പൊതു വിദ്യാഭ്യാസ വകുപ്പ്  വികസിപ്പിച്ച കെ -ഡാറ്റ് അഭിരുചി നിർണയ പരീക്ഷ പരിചയപ്പെടാനും പരീക്ഷയിൽ പങ്കെടുക്കാനും സൗകര്യമുണ്ട്‌. ഭിന്നശേഷി വിദ്യാർഥികൾക്കും രക്ഷിതാക്കൾക്കും വേണ്ടി കരിയർ, മാർഗ നിർദേശക സംവിധാനവുമുണ്ട്‌.  തോട്ടത്തിൽ രവീന്ദ്രൻ എംഎൽഎ അധ്യക്ഷനായി. മേയർ  ഡോ. ബീന ഫിലിപ്പ് മുഖ്യഭാഷണം നടത്തി. പൊതുവിദ്യാഭ്യാസവകുപ്പ് ഡയറക്ടർ കെ ജീവൻബാബു സംസാരിച്ചു.  പ്രിൻസിപ്പൽ സെക്രട്ടറി എ പി എം മുഹമ്മദ് ഹനീഷ് സ്വാഗതവും അക്കാദമിക് ജോയിന്റ്‌ ഡയറക്ടർ സുരേഷ് കുമാർ നന്ദിയും പറഞ്ഞു.